شريف صالح يكتب: محمود عبد العزيز .. المزاج الاسكندراني
بانوراما أدبية-شريف صالح يكتب: محمود عبد العزيز .. المزاج الاسكندراني-سيرة ذاتية-شعر-فن-الكتابة الإبداعية-قصة-رواية-نثر-سرد-أغاني-سينما-دراما
النهاردة ذكراه السادسة وتقريبا هو الممثل القدير الوحيد اللي ما كتبتش عنه
محمود اصغر من ابويا بعامين ولما كبر مع امتلائه بقيت احس فيه لمحة ما من ابويا.. وكلاهما ولد غير بعيد عن البحر المتوسط
الشعور انه الممثل هو انت بالضبط او شبه عزيز عليك ابوك وخالك وعمك
معناه انه قريب من القلب
ستغفر له هفواته وضعفه واخفاقاته
ستحبه في كل أحواله
هكذا كان محمود محمودا
ولانه اسكندراني وله مزاج البحر فاداؤه زي الموج في مرحه وغضبه وصخبه مالوش موجة ولا تتوقعه
ولانه اسكندراني ايضا فهو كان خارج المؤسسة الرسمية للتمثيل جاء من اقصى المدينة بمزاج الهواية
جاي يلعب وينبسط
ممكن الحظ خدمه في البداية زي احمد زكي بالوقوف امام سعاد حسني في عز مجده رغم انه شتان بين الوسامتين
وهذا مديني وذاك فلاح
لكن بيجمعهم انهم مش ممثلين وظيفيين ولا من اللي بيأدوا بالنحوي ولا بمبالغة خشبة المسرح
الاداء عندهم جاي من جوه قوي وبيطلع بسلاسة وعفوية من غير حتى احتياج لتنكر في الملامح
ويمكن وسامته الزايدة ظلمته شوية وكان ممكن تخليه حسين فهمي التاني
بس هو ماكنش مشغول بوسامته ولا عنده قلق من تصور المعجبات عنه
كان سايب روحه وبيقول لكل مخرج اكتشفني وخلينا نلعب سوا
فتلاقي رافت الميهي طلع منه الجانب الكوميدي بجمال
وهانلاقيه بالصدفة حل بدل عادل إمام في رافت الهجان ايقونة الدراما وفي اداء مناقض لمسلسله البشاير
ولا ابالغ لو قلت انه في فيلميه مع نور الشريف وحسين فهمي كان هو فاكهة الفيلمين الطازجة والمشطشطة
وبالتأكيد يظل اداؤه في الكيت كات درة التاج واحد اعظم الاداءات في تاريخ السينما العربية
هو مش من الممثلين اللي يعتزلوا ولا يشبعوا تمثيل ولا يملوا ويحبطوا
هو جاي يلعب لاخر نفس وبمنتهى المزاج
جاي يبسط نفسه قبل ما يبسطنا
ومش خنيق ومتغطرس بنجوميته بل كل اللي معاه لازم يلعبوا وينبسطوا حتى لو ممثلة في بداياتها زي منة شلبي
ما عندوش حسابات كتيرة ولا تخطيط محكم للحياة
ولا هيعمل كم من الفن
زي موج البحر بيندفع على حسب الريح
وبيمشي ورا روحه
ولأنه حالة طالعة من القلب بتوصل القلب وتعيش فيه
حالة فيما وراء الخير والشر والغضب.. تلاقيك تحبها ولا تفقد ابدا نبرتها الآسيانة والساخرة في نفس الوقت
وحياته كما اعماله تلخصها غنوته اللي كتبها له عمنا سيد حجاب
ياللا بينا تعالوا نسيب اليوم فى حالة
وكل واحد مننا يركب حصان خيالة
درجن درجن درجن درجن
هنهرب من النهاردة ونهرب من المكان
ونطير ونطير ..
نطير مع نسمة شاردة ونروح لايام زمان
إرسال تعليق