أنا والعذاب وهواك، قصيدة للشاعر محمود الشاذلي
كل ما تفتَح صفحه ..
إصفرِّ ورقها ،
بترَجَّعني كَهوف أجدادك ..
وترضَّعني عصور أمجادك ..
اللي إتأبِّد فيها حاميها ..
وبقىَ حراميها !!.
ولما ازعق بالصوت ع الموت ..
ياخد من روحك .. إبليسك
بتكَفَّرني ، وتسرق مني ..
خطوة قدمي لعتبة نوري !!.
مهما تعبِّط فيك أوهامك ،
وتزهزهلك سكة غُشمك
إني رضيت بالأمر ، وسيبتك ..
تلْزَق خاتم مُلْكي ف صابعك ،
وتقفِّل شبابيكي بشيشك
وتسَوَّرني بسلك حدودك ،
وتقسِّمني على ألاضيشك ،
مال وبنون وحريم ، وتبيعني
فاخرس عما قلبك واسمعني :
مهما تحوّط على غنَماتك ..
ح امنع سيرها قطيع ورا ضهرك ..
واقلب ليلها نهار مش طايْقك ..
وأبني حياتي الكارهه وجودك !!.
وارجع تاني لشمس أصيلي ،
شارب اسمي ولوني وميلي ..
وسُكَّر نيلي ،
ونيلي أميري
مريّح بالي ،
مربِّي عيالي ؛
على نغمات الحب جميل ،
ووقف الخلق .. بالأحضان
على شط النيل ،
ويغنوا لك على أرغولك ..
يا مصر قومي وشدي الحيل ،
كل اللي تتمنيه عندي ،
وأنا كل ما أقول ..
التوبه يا ابوي
بتنوَّر ليلي المواويل !!.
إرسال تعليق