الكاتبة صفاء عبد المنعم تكتب: ذكرياتي في حرب أكتوبر ٧٣
يوم ٦ أكتوبر ١٩٧٣.
كنا الساعة ٢ وربع ظهرا، وكانت جدتى بتحب تسمع نشرة الأخبار الساعة ٢،٥ على إذاعة البرنامج العام.
الراديو كان على الرف العالي في الصالة.
بعدها سمعنا صوت المذيع بيقول: لقد عبرت قوتنا المسلحة قناة السويس.
أنا صرخت وقلت:الحرب قامت.
جدتي أخدت الراديو من على الرف وقعدت فى الشارع، عشان الجيران تسمع الأخبار.
بقى فى اللى تزغرت، واللى تعيط، واللى تقول يا حبيبي يا أبنى.
على آخر النهار كنا عرفنا أن الحرب قامت وأننا أنتصرنا على الأعداء، وبقت جدتي تاخد الراديو كل يوم وتقعد فى الشارع والجيران تسمع الأخبار.
وبقينا نغنى زي الراديو، وحافظنا الأغاني، وأخذنا أجازة من المدرسة، وطول الليل نلعب فى الشارع ونسمع حكايات عن الحرب والضرب والإنتصار.
ولما حدثت الثغرة بكينا مع جارتنا مرات عمي لويس عشان أبن أختها فى الجيش التاني.
وقعدت جدتي تدعى له:ربنا ينصركم يا حبيبي.
لحد ما رجع مكرم.
وأمى فرقت شربات حلاوة رجوعه بالسلامة.
#ذكرياتي
#حرب_أكتوبر_١٩٧٣
إرسال تعليق