الكاتبة صفاء عبد المنعم تكتب: ذكرياتي في المدرسة الإعدادية
رحت مدرسة المسلة الإعدادية.
عالم جديد ومختلف.
كنا بنات بس
بنلبس جيب أزرق وقميص أبيض.
الجيب كانت فوق الركبة(مينى جيب )
ولأول مرة فكيت الضفيرتين وبقيت أعمل شعرى كحكة كبيرة.
وحلاوة نجاحي بتفوق بابا أشترى لي شنطة جلد بخمس جيوب.
كنت فرحانة بيها قوى.
ودخلت فصل ١/١
فصل المتفوقين فعلا.
وعرفت لعبة الحجلة.
وخجل البنات والخدود الحمرا من وقفة الشمس.
كنت باسمع البنات الأكبر مني بتتكلم فى السر عن حاجة اسمها الدورة الشهرية وبيشتروا مجلة طبيبك الخاص.
وكانت المدرسة جنبها مزرعة المساجين جنب المسلة.
فى المرواح نشترى منهم خس وفول حراتي.
ولأول مرة أكلم إنجليزي.
وأقول للأستاذ يا مستر.
ونقول جدمورننج بدل صباح الخير.
#ذكرياتي
#المدرسة_الإعدادي.
إرسال تعليق