تقليب في كتاب الفراعين، شعر: محمود الشاذلي

تقليب في كتاب الفراعين

محمود الشاذلي

تقليب في كتاب الفراعين، شعر: محمود الشاذلي

تقليب في كتاب الفراعين

بعد ما رتِّب حالُه ، ورطَّب بالُه ، 

وَضَّب نص سؤالُه ..

- " مين ويايا ، ومين بقى ضد ؟!.

مين سندي وضهري ، 

ومين بيهد ؟!

وسيناريو الإجابات الصيدَه ..

على سرده لأسئلتُه العيضَه ..

ورُّونا ليلتنا اللي اسوَدِّت ..

كيف داخت ، شاخت ، وامتدِّت

واهي شابت منها الدماغات !!.

من كُتر الحال اللي اتشقلِب

على كل الصدق اللي اتكدب

على بابا المستور الطيب

بدخولُه مَغارة الحراميَّه ..

بقى أخطر طَيِّب هَبِّيش !!.

بعمايله ؛ اتلفّع واتعايق 

واتكدِّب وعمل متضايق

سايق نرفزتُه اللي تكفَّر 

وبْوسع خروم طوق غُربالُه

فَرَّط في اليابس والأخضر !!.

وادي قاسم أخوه الخوّان

ما بقاش غفلان ولا خزيان

رمى موسه وساب دقنُه تهيش 

واتجلبب وقلب درويش 

علشان ما يخطط ويربط  

سلَّط أبدان على أبدان !!.

ولا ننسَى ، ولا نسهَى يا خِلِّي ؛ 

ان احنا المجموع الكُلي .. 

بالغصب اتكربسنا نسير ..

على جسْر مرَشَّق مسامير !!.

وح ننسى ، أو نسهى ازاي 

من فوبيا الخوف الأبضاي ؟!

بشيوع الجوع المتعكَّر ، والمتسخر

بعواصف وغيوم ريح صرصر ،

متكشر ، متنمَّر وأخطر !!.

 

وفضانا سمانا بيتغرغر

بسيول فيضان أحمر واصفر ، 

ح يبَهدل حال ، ويبَدِّل حال ،

وعرقنا مرَقنا ؛ في ليل طوبَه

ح يلَفَّع شمسنا برطوبه ..

أوحال ، أغلال ، ووبال أهوال ؛

على صدر بؤونه ، هاتور سَنْتر !!. 

***

27 مايو 2014