من مزايا الأسئلة!
أحمد عبد الواحد جمعة
.......................
إسئل كتير..
دي الأسئلة
صوت الضمير
موجوع قوي
إسئل كتير
وبلاش بقي
تسكت كتير
دي الأسئلة
حبة شعاع
فاسئل بقي
دي الضلمة
وصلت للنخاع
واسئل بقي
دي الأسئلة
مفاتيح طرق
أوطوق نجاه
للوطن لويوم غِرِق
فانطق بقي
خايف تموت
ماهو كله موت!!
أُنطق بقي
وبلاش تخاف
دا الخوف خازوق
مدقوق علي
خشم البدن
مغروز في قلبي الـ..
ممتهن
مابينتهيش
فانطق بقي
يمكن تعيش!!!
......... ....... .......
نفسي في ولد!!.
لو أرضي معتاده الحبل
طب ليه ما تولدشي؟؟!
وان أرضي ولدت ولد
طب ليه ما بيعيشي؟؟!
..............................
..
يا أرضي نفسي في ولد
منك وراجل بطل
عاشق لطمي النيل
ينحت في صخر الجبل
حالف برغم الليل
يكسر حدود الملل
يقدر يصحي الناس
يعمل معاهم عمل!!
يا أرضي نفسي في ولد
فلاح ومصري فصيح
أسطي في أرضه وريّس
يبدر تقاوي بصحيح
يبدر تقاوي كويّس
تطرح بوادر تصيح
تطرح ولاد ورجال
أصغر ولد مولود
لولحظه دمه يسيح
يجدل بدمه حبال
يجدل حباله يمّد
لاجل البعيد ينطال
بيقولوا يا ساده
عن أرضي ولاّده لكنها بأحوال
ساعة بتولد بطل
وساعات كتير أندال!
يا أرضي نفسي في ولد
عمره ما يطلب مدد
أو حتي يقبل سلف
مستغني باستمرار
لو حتي عشنا الخوف
أو عشنا بيه في ضلام
يقدر بقلبه يشوف
يخلقله ألف نهار
يا أرضي نفسي في ولد
طيب قوي وحنون
عمره ما يرضي يخون
عمره ما يرصي يكون
شخشيخه وهفيّه
حافظ دروس التاريخ
لهلوبه ومذاكر
عارف حدود القضيه
وان غيره خان أو باع
غمره ما يرضي يبيع
مصري لحد النخاع
وبيكره التطبيع
يا أرضي نفسي في ولد
مجدع ماهوش فاجر!!
يقدر يصون العرض
يحمي حدود الأرض
يكره يكون تاجر!!
فا ياتحبلي مظبوط
ويا تولدي مظبوط
ياتجيبي م الآخر
وتفضلي عاقر !!
ياتجيبي م الآخر
وتفضلي عاقر!!
إرسال تعليق