قبل الحساب بشطر
شعر : محمد صقر
تايه يا خال والسيرة خيط
ملضوم بسن حروفي شابك ف الورق
وكأن قلمي المنطوي أصبح عنيد
بيعاير العمر بقصيده وغمزتين ...او سحر نظرة فاتنة
قلبي اللي غاوي المرمطه قرر يتوب الليلة دي
جَّمع قصايده ف خط سير موال بيفرش خطوته
عايم ف نن العين خايف إن دمعة تنط مني تموته
هو اللي قاتل حضرته وانا البرئ المُنطوي
النص ده ....فاضح برائتي ف العلن
عرى اللي باقي ف البدن أو كل باقي ما انجرح
يا عابرين جوايا مني
غطوا اللي فاضل من حيائي
واعلنوا أن اللي مات كان حد أشبه بالسكات بين الكلام
أو حد فضَّل ينهزم لجل السلام
أو حد غاوي الانفصام عن جنس كونه... مختلف
النص ده... ألزمني إني أنحرف عن نهج سيرتي المبهمة
وأغض طرفي عن الفؤاد لما يصهلل ف الخلا تراتيل أغاني للأميرة النائمة
تايه يا خال
ولبست توب المهزلة بعد الوقار
ومسكت طرف الليل زغزغت النهار... فرماني برايا
ضفرت شوقي المخملي وطلعت بيه حد السما... ف لقيتني جوايا
ولأني واحد من بعض انصاص الرسل
والوحي سرب بيوت ف هيئة شعر سابح في بواطن جثتي الملعونة بالكتمان
النص ده ...
حرر قيود الصمت في الالحان
وعزفني نوته وتوته حدوته لكل زمان
عود كيان العقل يجزع اقتناع الروح بنظرتها الهلام
رتب خطى الأيام على حسب انشطار القلب تدريجي
و انت بتعدي السراط الصبح بدري فوق جحيم الأسئلة
كان مين بدأ نحر القصائد في العلن؟
أو مين ببصَّة لجتتي خربش حياء البدن؟
شفت الوهن؟
والعجز عن فهم البصيرة المعلنة
تايه يا خال
والتوهه وسط الملعنة...
أشبه بخوض الحرب شايل جثتي علي نصل قلمي وبرتجل
الموت حلال للنص لو أصبح عنيد.
إرسال تعليق